Abid ke laal aafaam ki shahadat ka roaz hai

Ye paanchwe Imam ki shahadat ka roaz hai 

Sultaan e khaas o aam ki shahadat ka roaz hai

Masoom naik naam ki shahadat ka roaz hai

Rone ki aarahi hai sadaa asmaan se

Lou uthgaye muhammad e baqir jahaan se

Sar peeto ehle bazm qaza ki imam ne

Kya dukh uthaaye sarwar e gardooñ imam ne

Bheja salaam jin pe rasool e anaam ne

Hou paish aah zehr e dagha inke saamne

Kya inqilaab gardish e layl o nahaar hai

Sajjad ke jigar ka kaleja figaar hai

Kab taab hai ke unke masaaib karu rakam

Mola ki zindagi bhi hai ik dastaan e ghum

Tifli mai karbala ke masaaib wo dum ba dum

Tha panchwa baras ke sitam par huwe sitam

Ik reesmaan e zulm mai nunni kalaayi thi

Baba ke saath qaid ki eeza uthaayi thi

Tha dushman e imam hashaam e na sa’eed

Berehmo mai shimr shakaawat mai tha yazeed

Ye bhi adu e aale nabi soorat e waleed

Mazloom par ghareeb par daale sitam shadeed

Dar pe huwa shaqi jo shahe dil malool ka

Tukrre kiya lehed mai kaleja rasool ka

Aamaadah qatl par jo huwa wo sitam shuwaar

Paiwast aik zeen mai kiya zehr e beshumar

Marqab pe charrhne ka diya phir hukam aik baar

Jab janasheen e malik e dul dul huwa sawaar

Mouka diya na zeest ne phir qatta rah ka

Sam ke asar se phool gaya jism shah ka

Neelee huwe ragain jasad e naazani pe aa

Tha aashikar e ghum ka paseena jabeen pe aa

Sultan e deen thair na sakain  pusht e zeen pe aa

Bas ya hussain keh ke wo utare zameen pe aa

Wo iztiraab tha shahe aali muqaam ko

Bistar pe aate aate ghush aaya imam ko

Tarrpe asar se zehr ke mola e dou jahaan

Tharraagayi zameen hila ghum se asmaan

Zilhajj ki saatvi ki sahar thi ke al’amaa

Jannat ko shahe deen ki sawaari huwi rawaa

Wo zehr tha ke jeene se dil sair hogaya

Emañ ki shamma bhujgayi andher hogaya