Imam Sajjad asws
Hai tauq e giraa zeyb e guluu paa’on mai Zanjeer
Sajjad ki likhi gayi hai ashko se taqdeer
1) maa behney phuphi saath hai bey maqna o chaadar
Beemaar banaa jaata hai khud Dard ki tasweer
2) zanjeero Mey jakrrey huwey zindaa Mey kharre hai
Aur haatho pey Sajjad ke hai laasha e hamsheer
3) khud roney lagey phootkey jab paa’on ke chaaley
Aalaam o masaib ki likhi sehra mai tehreer
4) beemaar ke chal chalkey qadam sooj gaye thay
Is baat se tang aur huwa halqa e Zanjeer
5) Zanjeer ki jhankaar mai nauhey ki sadaa thi
Masroof e baqaa nauhey se thi Bibi e dilgeer
6) us koofey mai Sajjad thay paaband musalsal
Wo kufa jo maula ka huwa karta tha jaageer
7) Rehan adaa ajr e risaalat kiyaa aisey
Ek farz samajhkar Kiya har nauhey Ko tehreer
