Marhaba marhaba marhaba marhaba

Hai ye shaadi Ali o Syeda ki

Aasmaan par hai farishton ke labon par sehra

Sar pe Haider ke sajaatay hain Payambar sehra

Surah-e-Noor ne chehre ki balaaen leen hain

Aa ke khud parhne laga surah-e-Kousar sehra

Khushbu-e-baagh-e-jinaan batne lagi hai har soo

Khuld se laaey hain Jibreel zameen par sehra

Lailatul Qadr ki rif'at talak aanay ke liye

Ban gaya surah-e-wa-shams ka mazhar sehra

Farq-e-Haider pe jo dekha to ye mehsoos hoowa

Saaray aalam mein hai ab sub se qad-aavar sehra

Husn-e-Yusuf bhi basad raskh tujhe dekhta hai

Teri zeenat jo bana chehra-e-Haider sehra

Us ne dar ka liya sar ka liya bosa is ne

Apni qismat mein hai Zohra ke baraabar sehra

Detay rehte thay Muhammad ko jo deen ke dushman

Tu ne baatil kiya wo taana-e-abtar sehra

Kousar-o-saaqi-e-kousar ko milaaya is ne

Bhar gaya pal mein hee taqdeer ka saaghar sehra

Jin ke ajdaad jala karte thay is sehre se

Sirf guzrega garaan aaj unhi par sehra

Karbala is ka samar hai so kiya Khaaliq ne

Deen-e-Ahmad ko bachaanay pe muqarrar sehra

Yaad-e-Akbar mein sunaaoonga main noha Meesam 

Jis ghari hoga saja khud mere sar par sehra