Qasim jo gire ghorre se tha maut ka pehra 

Tha khoon me duba hua wo chaand sa chehra 

Chalni tha badan teeron se har zakhm tha gehra 

Khoon sar se baha ban gaya ek larriyon ka sehra 

Is tarha larazta hua laasha nahi dekha 

Is shaan ka koi kabhi dulha nahi dekha 

Har jorr tha toota hua har band juda tha 

Bazu hai ye wo jis pe ke taweez bandha tha 

Kuchla hua seena tha lahu sar se baha tha 

Is phool se bacche pe ajab zulm hua tha 

Ye wazn tha taapon ka wahi toot gayi thi 

Sab pasliyaan seene me kahin toot gayin thi 

Maidaan me madad k liye bulaate thay qasim 

Jaate the idhar aur udhar aate thay qasim 

Dam attka tha aur chain nahi paate thay qasim 

Lagti thi jo taapaiñ to tarrap jaate thay qasim 

Ghorre se kuchal jane ki zehmat na dikhaye 

Allah kisi ko ye musibat na dikhaye 

Sheh khaak pe bhai ka pisar dhoond rahe hain 

Maidaan me wo laasha hai kahan dhoond rahe hain 

Aankho me andhera hai magar dhoond rahe hain 

Phir bhai ka har lakhte jigar dhoond rahe hain 

Tevaraake wahin girte hain ghush aata hai sheh ko 

Jab jism ka tukrra koi mil jata hai sheh ko 

Shabbir ne jisko Kabhi goudi me sulaaya 

Haathon ko bhi chuma kabhi seene se lagaya 

Taqdeer ne ye aaj ajab waqt dikhaya 

Laasha usi bacche ka hai chaadar me uthaya 

Thaame huwe khoon e hasan e khasta jigar hai 

Aaza ki ye gutherri nahi madar ka pisar hai 

Seh lete hain kuch dard bataaya nahi jaata 

Laasha kabhi hisso me uthaaya nahi jaata 

‘Gar shah rida apni bichhaye nahi jaate 

Tukrre Kabhi qasim k uthaaye nahi jaate 

Chaadar ko jo thaame huwe Abbas kharre hain 

Akbar bhi sahaare k liye paas kharre hain 

Kya haal tha laashe ka bataya nahi jaata 

Shabbir se sadma ye uthaya nahi jata 

Gehra hai bohot zakhm chupaya nahi jata 

Khaime ki taraf chalte hai jaya nahi jaata

Is gham ka kahan bhaar utha paayengi madar 

Jab laashe pisar dekhengi na reh paengi madar 

Dil apna sambhala Kabhi chaadar ko sambhala 

Khaime ki taraf barrhne lage syed e waala

Taarik hua jata tha aankhon ka ujala 

Chaadar me bandhi laash ko jab saamne dala

Madar ne ye poocha k kahan laal mera hai

dil hilta hai batlaiye is gutherri me kya hai 

Guttherri jo khuli hashr bapa hogaya harsoo

Tukrre tha badan laash ka aur khoon bhare gesu 

Taapo ke nishaan seene me aur aankho me aansu 

kehne laga aahista se Syeda ka wo mehroo 

Ye dekhiye jo ik tann e sadh paash hai bhaabi 

Pehchaniye qasim ki yehi laash hai bhabi