Sajjad jab dubaara aseer e jaffa huwe  

Zanjeer Aur Touq mai Phir mubtila huwe

Roohey Rasool-E Paak Ko sadme Siwaa huwe

Dard-O-Alam Rasool Ko La Intehaa Huwe

        Ghul Tha Kay Phir Madine Ki Basti Ujarrti Hai

        Gardan Mai Touq Paa’on Mai Zanjeer Parrti Hai

Roye Phupi Ko Dekh Kay Abid BaHaal e Zaar

Itney Mai Hukm Paakay Chali Fouj-E Naabakaar

Aage Tou Qaid Jaate Thay Sajjad-E Naamdaar

Thaa Unke Peechey Naaqa-E Bibi Jigarfigaar

        Uttha Tha Dil Mai Dard Qadam Thar Tharaate Thay

        Mahmal Ko Dekh Dekh Ke Aansu Bahaate Thay

Jab Sab Isi Tarhaa Se Huween Manzil-E Tamaam

Sehra Milaa Tab Ek Qareeb-E Deyaare Shaam

Din Chupp Gaya Namood Huwi Shaam e Teerafaam

Us Din Rayees-E Shaam Ne Sab Se Kiye Kalaam

        Uttro Yaheen Ke Raahat-E Aab-O Ta’aam Ho

        Behtar Yeh Hai Kay Shab Ko Isi Ja Muqaam Ho

Faarigh huwi Dua se Jo Bibi Ba Chashme Tarr

Umma Ko Tabh Bulaa Ke Ye Boli Woh Nauhagar

Yahaa se Bahut Qareeb Hai Sunti Hoon Woh Shajar

Khouli Ney Jis Darakht Mai Baandha Tha Sheh Ka Sar

        Ley Chal Wahaan Pey Syeda tahira Ki Jaayi Ko

        Rowungi Us Darakht ke Neeche mai Bhaai Ko

Royi Bayaan Kar Ke Jo Bibi baHaaley Zaar

Maabayn-E Dasht-E Haaye Hussaina Ki Thi Pukaar

Ek Baagh Tha Wahaan ke har Ek Gul Tha Jiska Naar

Tha Mohtemim Wahaan Ka Tameem-E Sitam shuaar

        Zulmat Ayaan Thi Kufr Ki Us Badh Khisaal Sey

        Rakhta Tha Bugz Dil mai Mohammed Ki Aal Se

Poocha ye usne Aakay Qareeb-E Sipaahey Shar

Bibi Yeh Kaunsi Hai Jo roti Hai Is Qadar

Bola koi Shaqi Ke Tujhe Kya Nahin Khabar

Bibi Yehi Hai Aashiq-E Sultan-E Behrobar

        Muddath Sey Sougwaar e Shahey Tashnakaam Hai

        Yeh khwaahar e Hussain Alay his-Salaam Hai

Sunna Tha Yeh Ke Ghez Mai Ayaa Woh Badh Zubaan

Pahuncha Qareeb-E Dukhtar-E Khatoon-E Ins o Jaan

Tha Aahni Jo Haath Mai Ek Bailchaa Giraan

Maara Shaqi Ney Farq Pe Bibi ke Naagahaan

        Ghash Aagaya Zameen Pe Tharraa ke Gir Parri

        Sar Par Lagi Woh Zarb Kay Tewaraa ke Gir Parri

E sar gharroh e aale aba wa museebataa

Sar par urraao khaaq e aza wa museebataa

Taazaa sitam ye aur huwa wa museebataa

Bibi ne ki jahaan se qaza wa museebataa

Jannat mai sougwaare shahe behrobar gayi

Jald aayiye ke bibi e dilgeer guzargayi